ភ្នំពេញ៖ គណបក្សប្រជាជនកម្ពុជា បានចេញសេចក្តីថ្លែងការណ៍ ស្តីពី កំណែទម្រង់ការបោះឆ្នោត នាពេលខាងមុខ។ សេចក្តីថ្លែងការណ៍របស់បក្សកាន់អំណាច ដែលបានផ្សព្វផ្សាយនៅព្រឹកថ្ងៃទី១៥តុលានេះ បានលើកឡើងនូវជំហរ និងការប្តេជ្ញាចិត្ត ៥ ចំណុច ដើម្បីកែទម្រង់ការបោះឆ្នោត នាពេលខាងមុខ ស្របតាមគោលការណ៍នៃលទ្ធិប្រជាធិបតេយ្យ និងនីតិរដ្ឋ។
សេចក្តីថ្លែងការណ៍របស់គណបក្សប្រជាជនកម្ពុជា ចុះថ្ងៃទី១៤ ខែតុលា ឆ្នាំ២០១៣ ដែលបានផ្សព្វផ្សាយ នៅព្រឹកថ្ងៃទី១៥ ខែតុលា ឆ្នាំ២០១៣ បានប្រកាសនូវជំហរ និងការប្តេជ្ញាចិត្តរបស់ខ្លួន ក្នុងការកែទម្រង់ការបោះឆ្នោត នាពេលខាងមុខ ស្របតាមគោលការណ៍នៃលទ្ធិប្រជាធិបតេយ្យ និងនីតិរដ្ឋ ដូចខាងក្រោម៖
១-ស្នើធ្វើវិសោធនកម្មច្បាប់ និងនីតិរដ្ឋទាំងឡាយ ដែលពាក់ព័ន្ធនឹងការបោះឆ្នោត ជាអាទិ៍ ច្បាប់ស្តីពីការបោះឆ្នោត ច្បាប់ស្តីពីគណបក្សនយោបាយ បទបញ្ជា និងនីតិវិធី នៃការបោះឆ្នោត ដើម្បីធានាដល់ការកែលម្អឲ្យកាន់តែសុក្រឹតថែមទៀត នូវដំណើរការនៃការបោះឆ្នោត។
២-ស្នើឲ្យមានក្របខណ្ឌគតិយុត្តិមួយចំនួនថែមទៀត ដើម្បីបន្តលើកកម្ពស់សុចរិតភាព និងតម្លាភាព នៃដំណើរការបោះឆ្នោត ជាអាទិ៍ ការស្នើសេចក្តីព្រាងច្បាប់ ស្តីពី ថវិកាគណបក្សនយោបាយ ច្បាប់នានា និងលិខិតបទដ្ឋានមួយចំនួនទៀត ពាក់ព័ន្ធនឹងការបោះឆ្នោត។ល។
៣-ក្នុងដំណើរការកំណែទម្រង់ខាងលើនេះ គណបក្សប្រជាជនកម្ពុជា ប្រកាន់គោលការណ៍បើកចំហ និងទទួលយកមកសិក្សា នូវអនុសាសន៍នានា ទាំងជាតិ និងទាំអន្តរជាតិ ទាក់ទងនឹងការបោះឆ្នោត។
៤-យន្តការសមស្របមួយ អាចនឹងត្រូវបង្កើតឡើង ដើម្បីសិក្សាស្រាវជ្រាវបង្កើតឲ្យបានក្របខណ្ឌកំណែទម្រង់ការបោះឆ្នោត ស្របតាមគោលការណ៍ប្រជាធិបតេយ្យសេរី ត្រឹមត្រូវ និងយុត្តិធម៌។
៥-ក្របខណ្ឌកំណែទម្រង់ដ៏មានសារៈសំខាន់នេះ ត្រូវធ្វើតាមរយៈអង្គការនីតិប្រតិបត្តិ និងនីតិបញ្ញត្តិ។
សេចក្តីថ្លែងការណ៍ ស្តីពីកំណែទម្រង់ការបោះឆ្នោត នាពេលខាងមុខ ត្រូវបានគណបក្សប្រជាជនកម្ពុជា បញ្ជាក់ថា ធ្វើឡើង ផ្អែកលើរដ្ឋធម្មនុញ្ញ និងច្បាប់ជាធរមាននានា នៃព្រះរាជាណាចក្រកម្ពុជា និងយោងតាមស្ថានការណ៍ជាក់ស្តែងក្រោយការបោះឆ្នោត ជ្រើសតាំងតំណាងរាស្ត្រ នីតិកាលទី៥ កាលពីថ្ងៃទី២៨ ខែកក្កដា ឆ្នាំ២០១៣ កន្លងទៅ និងយោងតាមជំនួបរវាងថ្នាក់ដឹកនាំគណបក្សប្រជាជនកម្ពុជា និងថ្នាក់ដឹកនាំគណបក្សសង្គ្រោះជាតិ កាលពីថ្ងៃទី១៦ ខែកញ្ញា ឆ្នាំ២០១៣។
ចុងបញ្ចប់ នៃសេចក្តីថ្លែងការណ៍ គណបក្សប្រជាជនកម្ពុជា បានអំពាវនាវចំពោះសហគមន៍ជាតិ និងអន្តរជាតិ សូមមេត្តាបន្តគាំទ្រដំណើរការ នៃលទ្ធិប្រជាធិបតេយ្យ សេរី ពហុបក្ស និងនីតិរដ្ឋ រួមចំណែកដល់បុព្វហេតុផ្សះផ្សារ បង្រួបបង្រួមជាតិ សន្តិភាព ស្ថិរភាព និងការអភិវឌ្ឍនៅកម្ពុជា ជាបន្តទៀត៕
ប្រភព៖ CEN
