 |
| អាគារកំពុងសាងសង់នៅក្បែរព្រះបរមរាជវាំង |
សាលារាជធានីភ្នំពេញនៅព្រឹកថ្ងៃ សុក្រនេះបានកោះប្រជុំ មុននឹង សម្រេចវាយកម្ទេសអគារចំនួនពីរកន្លែងនៅជិត ព្រះបរមរាជវាំង ដែលអាជ្ញាធរបាន ចោទថាសង់ខ្ពស់ហួសការកំណត់របស់ច្បាប់។
ក្នុងកិច្ចប្រជុំ របស់សាលារាជធានីភ្នំពេញ កាលពីថ្ងៃទី១៦ ខែតុលា អភិបាលរាជធានីភ្នំពេញ លោក ប៉ា សុជាតិវង្ស បានឲ្យដឹងថា សំណង់បំពានច្បាប់ពីរកន្លែងក្បែរ ព្រះបរមរាជវាំង ដែលសង់ខ្ពស់ពីការអនុញ្ញាតរបស់ច្បាប់ នឹងត្រូវវាយកម្ទេចចោល ដោយ សារខុសច្បាប់ និងខុលក្ខខណ្ឌបច្ចេក ទេស។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បញ្ជាក់ប្រាប់VOD នៅព្រឹកនេះថា គម្រោងវាយកម្ទេច សំណង់អគារពីរកន្លែងនោះ គឺអគារមួយនៅលើផ្លូវលេខ ១៨៤ ទល់មុខមាត់ទន្លេ ក្បែរព្រះបរមរាជវាំង ជាសំណង់របស់ក្រុមហ៊ុនអចលនទ្រព្យ វឌ្ឍនៈ ដែលសមត្ថកិច្ចរកឃើញថា សង់ហួសការអនុញ្ញាតដល់ទៅជិត១០ម៉ែត្រ។ សម្រាប់អគារមួយទៀតនោះ គឺមានទីតាំង ស្ថិតនៅខាងជើងឈៀងខាងលិចសារៈមន្ទីរជាតិ។ លោកអះអាងថា ករណីនេះ គឺកំពុងស្ថិតក្នុងការពិភាក្សា ហើយសាលារាជធានីភ្នំពេញ នឹងធ្វើសេចក្តីសម្រេចបន្ទាប់ពីបញ្ចប់កិច្ចពិភាក្សា។
ចំណែក អគារខាង ក្រោយសាកលវិទ្យាល័យភូមិន្ទវិចិត្រសិល្បៈ តាមបណ្តោយផ្លូវលេខ ១៩ ម្ចាស់អាគារ លោក គឹម ហេង ឲ្យដឹងថា លោក មិនដឹងពីរឿងនេះទេ ព្រោះលោក មិនទាន់ទទួលបានការជូនដំណឹងពីសាលារាជធានីថា តើគម្រោងវាយកម្ទេសនោះ ប៉ះចំអគាររបស់លោកឬយ៉ាងណា។ ប៉ុន្តែ លោកទទួលស្គាល់ថា លោក ពិតជាបានសង់អគារនេះ ខ្ពស់ជាងនឹងច្បាប់កំណត់បន្តិចបន្តួច ហើយលោក សោកស្តាយចំពោះករណីនេះ។
អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក បេងហុង សុជាតិខេមរ៉ូ មានប្រសាសន៍ថា ជាធម្មតា គឺអាជ្ញាធរមានសមត្ថកិច្ច ទទួលពាក្យស្នើសុំ និងចុះត្រួតពិនិត្យ ត្រឹមត្រូវ ដោយអនុញ្ញាតច្បាប់ឲ្យបើកការដ្ឋាន សាងសង់ តែបញ្ហាចោទ ក្នុងដំណាក់កាលសាងសង់ គឺម្ចាស់អគារ ទាំងនេះ បានសង់លើសពីការស្នើសុំរបស់ខ្លួនទៅទៀត៕
ប្រភព៖ VOD
