 |
| កម្លាំងរបស់អាជ្ញាធររាជធានីកំពុងរុះរើសំណង់លើដីដកហូតពីយាយក្រពើ នៅសង្កាត់ភ្នំពេញថ្មី |
ភ្នំពេញៈ លោកស្រី ឈិន សុគន្ធារី ហៅយាយ ក្រពើ ប្រធានក្រុមប្រឹក្សាភិបាលក្រុមហ៊ុន ឡាយីម៉ិច ហូលឌីង គ្រុប បានអះអាង កាលពីម្សិលមិញថា ដោយសារតែការចុះហត្ថលេខារបស់លោកនាយករដ្ឋមន្រ្តី ហ៊ុន សែន កាត់ដីបឹងឲ្យក្រុមហ៊ុនឯកជន ក្រោមស្លាកដើម្បីសាងសង់ពហុកីឡដ្ឋាន មរតក តេជោ ធ្វើឲ្យលោក ឧកញ៉ា លី យ៉ុងផាត់ ជាម្ចាស់ក្រុមហ៊ុននេះចំណេញប្រាក់ជាង ៥០០ លានដុល្លារអាមេរិកពីការរំលោភយកដីកម្មសិទ្ធិឯកជនក្រុមហ៊ុន របស់គាត់ដែលជាដីគោកមិនមែនជាបឹងជាង ៣៤ ហិកតា និងដីរបស់ប្រជាពលរដ្ឋរងគ្រោះផ្សេងៗទៀត ស្ថិតនៅក្នុងសង្កាត់ ភ្នំពេញថ្មី ខណ្ឌ សែនសុខ រាជធានី ភ្នំពេញ។
តាមអ៊ីមែលផ្ញើមក ភ្នំពេញ ប៉ុស្តិ៍ ម្សិលមិញអ្នកស្រី សុគន្ធារី អះអាងថា ការដកហូតយកដីក្រុមហ៊ុនគាត់ ៣៤ ហិកតានេះ គឺគ្មានតម្រូវការដើម្បីប្រយោជន៍សាធារណៈឡើយ គឺដកហូតយកពីក្រុមហ៊ុនគាត់ដែលកាន់កាប់ស្របច្បាប់យកទៅឲ្យក្រុមហ៊ុនមួយទៀត សម្រាប់លក់យកចំណេញកប់ក្ដោង។ អ្នកស្រីថា បច្ចុប្បន្នដីជាកម្មសិទ្ធិរបស់គាត់ និងរបស់ប្រជាជនរងគ្រោះដទៃទៀត ដែលបានដកហូតតាមអនុក្រឹត្យលេខ ១០១ អនក្រ.បក ចុះថ្ងៃ ទី១០ ខែ កក្កដា ឆ្នាំ ២០១២ នោះត្រូវគេលក់បន្ដឲ្យទៅក្រុមហ៊ុនបុរី ពិភពថ្មី ហើយដែលបុរី ពិភពថ្មីកំពុងសង់ផ្ទះល្វែង វីឡា ផ្សារទំនើប ជាប្រយោជន៍ឯកជនសុទ្ធសាធ។
អ្នកស្រី សុគន្ធារី បន្តថា ចាប់ពីការដកហូតដីគាត់និងមានចំណារពីលោកនាយករដ្ឋមន្រ្តី ឲ្យចាប់ខ្លួនគាត់ ពលរដ្ឋដែលមានដីនៅជិតដីក្រុមហ៊ុនគាត់មានការភិតភ័យ ហើយក៏បាននាំគ្នាលក់ដីឲ្យទៅលោក ឧកញ៉ា លី យ៉ុងផាត់ ក្នុងតម្លៃ ៧០ ដុល្លារ ក្នុងមួយ ម៉ែត្រក្រឡា។
អ្នកស្រីអះអាងថា៖ «លោក ឧកញ៉ា លី យ៉ុងផាត់ ប្រមូលទិញដីពីប្រជាពលរដ្ឋទាំងនោះបានប្រមាណជាង ១០០ ហិកតាថែមទៀត។ ដូច្នេះដីគាត់សរុបមានជាង ២០០ ហិកតា ទាំងដី ទិញថោកៗ និងដីបានទទេតាមរយៈអនុក្រឹត្យខាងលើ គាត់លក់បានចំណេញជាង ៥០០ លានដុល្លារអាមេរិក។ ឧកញ៉ា លី យ៉ុងផាត់ បានលក់ដីនេះក្នុងតម្លៃជិត ៣០០ ដុល្លារអាមេរិក ក្នុងមួយ ម៉ែត្រក្រឡា។ ដោយឡែកដីក្រុមហ៊ុននាងខ្ញុំ នៅជាប់ផ្លូវកៅស៊ូខាងមុខមានតម្លៃដល់ទៅ ៥០០ ដុល្លារក្នុងមួយម៉ែត្រក្រឡា។ ទឹក ប្រាក់ដ៏ច្រើនសន្ធឹកសន្ធាប់ដែលបានមកដោយមិនបាច់ប្រឹង នេះ មិនដឹងជាគាត់យកប៉ុន្មានមកដាក់ជាប្រយោជន៍ជាតិទេ ព្រោះអ្វីៗ ប្រព្រឹត្តទៅដោយគ្មានតម្លាភាពទាល់តែសោះ។
ពាក់ព័ន្ធនឹងការកាន់កាប់ដី ៣៤ ហិកតាដែលអនុក្រឹត្យកាត់យកនេះអ្នកស្រី ឈិន សុគន្ធារី ពន្យល់ថា គាត់បានទិញតាំងពីឆ្នាំ ១៩៩៩ ម៉្លេះ មានលិខិតផ្ទេរសិទ្ធិនិងមានការទទួលស្គាល់ដឹងឮពីអាជ្ញាធរមូលដ្ឋាន និងបានបង់ពន្ធប្រចាំឆ្នាំ ២០១១ ជូនរដ្ឋរួចទៀតផង។ លោកស្រីថា បើយោងតាមលិខិតលេខ ៦៩៩ ធទឧ ចុះថ្ងៃ ទី០៣ ខែ មេសា ឆ្នាំ ២០១២ របស់គណៈកម្មាធិការកំណត់ផ្ទៃទីតាំងបឹងបួក្នុងព្រះរាជាណាចក្រកម្ពុជា ផ្ញើជូនលោកនាយករដ្ឋមន្រ្តីសម្រេចនិងការកំណត់ផ្ទៃបឹង ពោងពាយ គឺតម្រូវការចាំបាច់សម្រាប់អាងស្តុកទឹកមានត្រឹមតែ ៥៣,៣១ ហិកតាប៉ុណ្ណោះ ហើយនាយករដ្ឋមន្រ្តីក៏បានឯកភាពតាមចំណារចុះថ្ងៃ ទី០៩ ខែ មេសា ឆ្នាំ ២០១២ ឃើញថា ដីរបស់គាត់ គឺមិនស្ថិតនៅក្នុងតំបន់អាងស្តុកទឹករបស់រដ្ឋនោះឡើយ។
លោក ជា សាវាន អាយុ ៦២ ឆ្នាំ ជាមន្រ្តីអប់រំចូលនិវត្តន៍ក្រីក្ររស់នៅតំបន់នោះ បានឲ្យដឹងថាគាត់បានទិញដីមួយកន្លែងទំហំ ១ ហិកតា នៅក្នុងឆ្នាំ ១៩៨៩ រួចហើយបានសាងសង់ផ្ទះទំហំ ៦ ម៉ែត្រគុណ ៧ ម៉ែត្រនៅលើដី ដែលបច្ចុប្បន្នមានទីតាំងនៅផ្ទះលេខ ៣៦៩ ផ្លូវ ១៩២៨ ក្នុងភូមិ ពោងពាយ សង្កាត់ ភ្នំពេញ ថ្មី ខណ្ឌ សែនសុខ និងបានរស់នៅនិងអាស្រ័យផលលើដីនេះតាំងពីឆ្នាំ ១៩៨៩ រហូតមក មានរយៈពេលជាង ២៣ ឆ្នាំហើយ។
លោកបានបន្តថា ចាប់តាំងពីសាលារាជធានីភ្នំពេញ បានរំលោភបំពាននិងកាត់យកដីកម្មសិទ្ធិស្របច្បាប់របស់គាត់ទំហំ ៣៥ ម៉ែត្រគុណ ៧០,២០ ម៉ែត្រចូលជាសម្បតិ្តរដ្ឋ ពីឆ្នាំ ២០១២ រហូតមកទល់ពេលនេះ សាលា រាជធានីភ្នំពេញ មិនទាន់បានដោះស្រាយគោលនយោបាយឬសងជំងឺចិត្តអ្វីឲ្យគាត់ឡើយ អាជ្ញាធររាជធានីហាក់ដូចជាចង់លេបត្របាក់ឬប្លន់យកដីរបស់គាត់ឆៅៗតែម្តង។ លោកក៏ស្នើសុំឲ្យលោកនាយករដ្ឋមន្រ្តី អាណិតមេត្តាពិនិត្យនិងសម្រេចជាថ្មី អំពីកាត់ដីគាត់ដែលជាកម្មសិទ្ធិស្របច្បាប់ចេញពីអនុក្រឹត្យលេខៈ ១០១ អនក្រ.បក នោះ និងសុំឲ្យសម្តេចនាយករដ្ឋមន្រ្តី ហ៊ុន សែន ពិនិត្យ ចាត់វិធានការនិងដាក់ទណ្ឌកម្ម ទៅលើមន្ត្រីខិលខូច ពុករលួយថ្នាក់ក្រោម ដែលឃុបឃិតនិងធ្វើរបាយការណ៍ភូតកុហកនាយករដ្ឋមន្រ្តីឲ្យចុះហត្ថលេខាលើអនុក្រឹត្យខាងលើនេះ ដើម្បីស្តារកិត្តិយសនិងកិត្តិនាមរបស់ថ្នាក់ដឹកនាំ និងបង្កើនភាពជឿទុកចិត្តរបស់ប្រជាពលរដ្ឋចំពោះរដ្ឋាភិបាលឡើងវិញ។
លោក បញ្ជាក់បន្ថែមថា តាមការស្រាវជ្រាវរបស់លោកផ្ទាល់ យ៉ាងហោចមានប្រជាជនរងគ្រោះជាង ១០ គ្រួសារ ដែលបានបាត់បង់ដីកម្មសិទ្ធិប្រមាណជាងពាក់កណ្តាលនៃផ្ទៃដីសរុបរបស់ខ្លួន ដែលបណ្តាលពីការកំណត់ក្នុងអនុក្រឹត្យលេខៈ ១០១ អនក្រ.បក (ទំហំជាង ៧០ ហិកតា) ឥឡូវដីទាំងអស់នោះត្រូវសាលារាជធានីភ្នំពេញលក់ទៅឲ្យក្រុមហ៊ុនឯកជនមួយចំនួនយកទៅ សង់ផ្ទះល្វែងឬវីឡាលក់ ដែលមិនដើម្បីប្រយោជន៍សាធារណៈយ៉ាងចេញមុខទៀតផង។
លោក អំ សំអាត មន្ត្រីស៊ើបអង្កេតជាន់ខ្ពស់នៃអង្គការ លីកាដូ ថ្លែងថាការកាត់ដីកម្មសិទ្ធិស្របច្បាប់របស់ពលរដ្ឋដាក់ ក្នុងអនុក្រឹត្យឬជាទ្រព្យសម្បត្តិរដ្ឋនៅក្នុងភូមិ ពោងពាយ ឬ បឹង បាយាប ខណ្ឌ សែនសុខ នេះ បានរំលោភទៅលើសិទ្ធិរស់នៅនិងការសង់លំនៅឋានរបស់ប្រជាពលរដ្ឋ។
លោកបន្តថា៖ «ប្រសិនបើរាជរដ្ឋាភិបាលត្រូវការវិនិយោគដីនៅទីនោះ ឬ ត្រូវការដីកម្មសិទ្ធិរបស់គាត់ដើម្បីធ្វើការអភិវឌ្ឍនោះ រដ្ឋាភិបាលគួរមានគោលនយោបាយដោះដូរដី ឬ ផ្តល់សំណងដល់ពួកគាត់ឲ្យបានសមរម្យ។
រដ្ឋាភិបាលមិនអាចកាត់ដីពលរដ្ឋស្របច្បាប់ដាក់ចូលក្នុង អនុក្រឹត្យ ឬជាសម្បត្តិសាធារណៈ ដោយមិនទូទាត់សំណងឬផ្តល់សំណងគោលនយោបាយជាមុនឡើយ។
លោក អំ សំអាត បញ្ជាក់ថា តាមការស្រាវជ្រាវរបស់ លីកាដូ កន្លងមករាជរដ្ឋាភិបាលក៏ធ្លាប់បានចេញអនុក្រឹត្យកំណត់ព្រំដី សម្រាប់អភិរក្សដែនជម្រកសត្វព្រៃនិងសម្រាប់ធ្វើការអភិវឌ្ឍផ្សេងៗ និងបានប៉ះពាល់ដីកម្មសិទិ្ធស្របច្បាប់របស់ប្រជាពលរដ្ឋ ជាច្រើនដែរ។ ប៉ុន្តែរដ្ឋាភិបាលក៏បានធ្វើការកែសម្រួលអនុក្រឹត្យព្រម ទាំងប្រគល់ដីកម្មសិទ្ធិនោះ ជូនប្រជាពលរដ្ឋវិញផងដែរ។
អ្នកតំណាងរាស្ត្រ កែប ជុតិមា អតីតអភិបាលរាជធានីនិងលោក លឹម គានហោ រដ្ឋមន្រ្តីក្រសួង ធនធានទឹកនិងឧតុនិយមមិនអាចទាក់ទងដើម្បីសុំការបំភ្លឺបានទេ កាលពីម្សិលមិញ៕
ប្រភព៖ ភ្នំពេញប៉ុស្តិ៍
