ជាការពិតណាស់នៅរយៈពេលចុងក្រោយនេះ ការផ្ទុះឡើងនូវបាតុកម្ម កូដកម្ម ឬការជួបជុំរបស់ប្រជាពលរដ្ឋ និងកម្មករ ពិតជាកើតឡើងច្រើន គួរឲ្យកត់សម្គាល់។
ជាក់ស្ដែងគ្រាន់តែនៅថ្ងៃទី២១ ខែតុលានេះមានផ្ទុះកូដកម្មទាមទារ លក្ខខណ្ឌការងារពីសំណាក់ក្រុមកម្មកររោងចក្រSL និងនៅថ្ងៃដដែលដែរនេះក៏មានក្រុមបណ្ដាញពហុវិស័យក៏បានជួបជុំគ្នា ដើម្បីបង្ហាញក្ដីកង្វល់របស់ពួកគេផងដែរ។
អ្នកតាមដានស្ថានការសង្គមនៅកម្ពុជា លោកកែម ឡី បានលើកឡើងថា ការផ្ទុះឡើងនូវបាតុកម្ម កូដកម្ម ឬការជួបជុំរបស់ប្រជាពលរដ្ឋ និងកម្មករមានការកើនឡើងនេះកើតឡើងដោយសារ មានការគាបសង្កត់ច្រើន ប្រជាពលរដ្ឋមានការយល់ដឹងច្រើន អំពីសិទ្ធិធ្វើបាតុកម្ម កូដកម្ម ឬការជួបជុំរបស់ខ្លួនបញ្ហាសង្គមកើតឡើងច្រើន និងមិនមានដំណោះស្រាយជាដើម។
យ៉ាងណាក៏ដោយលោកកែម ឡី អ្នកអ្នកតាមដានស្ថានការសង្គមនៅកម្ពុជារូបនេះបានផ្ដល់អនុសាសន៍ខ្លះៗ ទៅរដ្ឋាភិបាលដូចជា រដ្ឋាភិបាលត្រូវចចារគ្នាជាមួយគណបក្សប្រឆាំង ដើម្បីបង្កើតយន្ដការរដ្ឋសភា និងមានការសម្របសម្រួលខាងផ្នែកនយោបាយ។
រដ្ឋាភិបាលត្រូវជំរុញយន្ដការដោះស្រាយបញ្ហាពិតប្រាកដ ដោយមានការចូលរួមពីប្រជាពលរដ្ឋ សង្គមស៊ីវិល និងដៃអភិវឌ្ឍ។ និងម្យ៉ាងទៀត រដ្ឋាភិបាល គួរផ្ដល់សិទ្ធិបញ្ចេញមតិពេញលេញដល់ប្រជាលរដ្ឋជាដើម។
គួរបញ្ជាក់ថា គណបក្សប្រឆាំង គឺគណបក្សសង្គ្រោះជាតិគ្រោងធ្វើបាតុកម្មរយៈពេល ៣ថ្ងៃ ចាប់ពីថ្ងៃទី២៣តុលា ដល់ថ្ងៃទី២៥ តុលា ដើម្បីទាមទាររកយុត្ដិធម៌ជូនប្រជាពលរដ្ឋម្ចាស់ឆ្នោត និងទាមទារឲ្យរដ្ឋាភិបាលគោរពឲ្យបានពេញលេញនូវកិច្ចព្រមព្រៀងទីក្រុងប៉ារីស ថ្ងៃ២៣ តុលា ១៩៩១។
ដោយឡែកសហជីពកម្មកររបស់លោកជា មុន្នី ក៏បានអំពាវនាវកម្មកររោងចក្រនៅទូទាំងប្រទេសធ្វើកូដកម្មផ្អាកការងាររយៈពេលពីរថ្ងៃផងដែរ ដើម្បីរកយុត្ដិតំណាងកម្មករដែលកំពុងជាប់ពន្ធនាគារ និងទាមទារតម្លើងប្រាក់ខែជូនកម្មករឲ្យបាន ១៥០ដុល្លារជាដើម៕
ប្រភព៖ វាយោ
