មេដឹកនាំបក្សប្រឆាំងដែលកំពុងស្វែងរកអន្តរាគមន៍ពីសហគមន៍អន្តរជាតិ ដោយបានឆ្លងកាត់ការធ្វើដំណើរនៅអឺរ៉ុប និងអាមេរិក បាននិយាយកាលពីថ្ងៃម្សិលមិញថា សហគមន៍អន្តរជាតិ បានគាំទ្រជំហររបស់លោក ក្នុងការស្វែងរកយុត្តិធម៌ជូនម្ចាស់ឆ្នោត ដែលលោកហៅថា ការលួចបន្លំសន្លឹកឆ្នោត កើតមានជាប្រព័ន្ធនៅក្នុងការបោះឆ្នោតសភា កាលពីថ្ងៃទី២៨ ខែកក្កដា។
ថ្លែងនៅក្នុងទីក្រុងវ៉ាស៊ីនតោន បន្ទាប់ពីបេសកម្មរបស់លោកបញ្ចប់នៅអឺរ៉ុប និងអាមេរិកនៅថ្ងៃនេះ លោក សម រង្ស៊ី ប្រធានគណបក្សសង្គ្រោះជាតិមានប្រសាសន៍ថា រដ្ឋាភិបាល និងសភានៅក្នុងប្រទេសអ៊ឺរ៉ុប និងសហរដ្ឋអាមេរិក រួមទាំងប្រទេសជាច្រើនទៀត បានគាំទ្រគោលជំហររបស់គណបក្សសង្គ្រោះជាតិ ក្នុងការទាមទារឲ្យមានការស៊ើបអង្កេតឯករាជ្យមួយ ពីភាពមិនប្រក្រតីនៃការលួចបន្លំសន្លឹកឆ្នោត។ លោកបានបញ្ជាក់ទៀតថា សហភាពអឺរ៉ុប និងប្រទេសដទៃទៀត បានសម្តែងនូវមន្ទិលសង្ស័យនៃលទ្ធផលបោះឆ្នោតនេះ។
លោក សម រង្ស៊ី កាលពីសប្តាហ៍មុននេះ បានឆ្លងកាត់ប្រទេសអង់គ្លេស បារាំង និងប្រទេសបែលហ្សិក នៅគ្រានោះ លោកបានជួបជាមួយអ្នកតំណាងរាស្ត្រនៃសហគមន៍អឺរ៉ុប។
តាមសេចក្តីរាយការណ៍ មានអ្នកតំណាងរាស្ត្រ សហគមន៍អឺរ៉ុប ប្រមាណជិត១០០នាក់ បានគាំទ្រជំហររបស់លោក ដែលទាមទារឲ្យមានយុតិ្តធម៌សម្រាប់ម្ចាស់ឆ្នោតប្រជាជនកម្ពុជា ។ លោក សម រង្ស៊ី កាលពីថ្ងៃម្សិលមិញ បានជួបជាមួយអនុរដ្ឋមន្ត្រីការបរទេសអាមេរិក លោក William Burn ផងដែរ។ នៅក្នុងជំនួបនោះ លោកបានពិភាក្សាជាច្រើនពីបរិបទនយោបាយនៅកម្ពុជា ហើយនៅក្នុងនោះ អ្នកនាំពាក្យក្រសួងការបរទេសអាមេរិក លោកស្រី ជែន សាគី(Jen PsaKi) បានប្រាប់អ្នកសារព័ត៌មានអន្តរជាតិជាច្រើនថា សហរដ្ឋអាមេរិកនៅតែមានជំនឿថា ភាគីពាក់ព័ន្ធនៅកម្ពុជាទាំងអស់ និងស្វែងរកដំណោះស្រាយ បន្តទៀតដើម្បីបង្កើតយន្តការឯករាជ្យមួយ ស៊ើបអង្កេតលទ្ធផលបោះឆ្នោត ដែលប្រឈមមុខ និងភាពចម្រូងចម្រាសនេះ។
លោកស្រីបញ្ជាក់ថា សហរដ្ឋអាមេរិកមានជំនឿថា ភាគីទាំង២ គឺគណបក្សប្រជាជនកម្ពុជា និងគណបក្សសង្គ្រោះជាតិនឹងបញ្ចប់ការខ្វែងគំនិតគ្នា តាមរយៈការដោះស្រាយដោយសន្តិវិធី។
លោក សម រង្ស៊ី គ្រោងនឹងត្រលប់មកប្រទេសបារាំងវិញនៅសប្តាហ៍នេះ ហើយលោកក៏គ្រោងត្រលប់មកប្រទេសកម្ពុជា វិញដើម្បីឲ្យទាន់នៃការធ្វើមហាបាតុកម្មរបស់គណបក្សលោកនៅថ្ងៃទី២៣ ខែតុលា សប្តាហ៍ក្រោយនេះ៕
ប្រភព៖ VOD
