វៀតណាម​ត្រៀម​ជាង ៨ពាន់​លាន​ដុល្លារ ​សង់​ប្រលាន​យន្តហោះ ៤​ទៀត

ប្លង់​គំរូ​អាកាសយានដ្ឋាន​អន្តរជាតិ​Long Thanh

​អាកាសចរណ៍​ស៊ីវិល​វៀតណាម CAAV ប៉ុន្មាន​ម៉ោង​មុន​នេះ​បាន​ឲ្យ​ដឹង​ថា ខ្លួន​គ្រោង​សាង សង់​ប្រលាន​យន្តហោះ​ ​​​៤ ​បន្ថែមទៀត ក្នុង​កញ្ចប់​ទឹកប្រាក់​ប្រហែល ៨,១ពាន់​លានដុល្លារ ​អាមេរិក ដែល​អាច​ដឹក​ជញ្ជូន​​អ្នក​ដំណើរ​អន្តរជាតិ​រហូត​ដល់​ទៅ​ជាង ១០០លាន​នាក់​ និង​ទំនិញ​រាប់​ម៉ឺន​តោន​ក្នុង​មួយ​ឆ្នាំៗ។

ការដ្ឋាន​ជើង​ហោះ​ហើរ​ទាំង​បួន​នោះ ត្រូវ​បាន​សារព័ត៌មាន​វៀតណាម​ណិត ​រាយការណ៍​ ថា​មាន​អាកាសយានដ្ឋាន​អន្តរជាតិ​Long Thanh ដែល​មាន​ទីតាំង​ស្ថិត​នៅ​ភាគ​ខាង​ត្បូង​នៃ​ខេត្ត​ Dong Nai។ ដោយ​ឡែក​អាកាសយានដ្ឋាន​អន្តរជាតិ​ ៣​ផ្សេង​ទៀត​មាន Chu Lai, Quang Ninh និង​Cam Ranh។

គម្រោង​រយៈពេល​ ១០​ឆ្នាំ​ដើម្បី​ជួយ​សម្រួល​ការ​ដឹក​ទំនិញ និង​ទាក់ទាញ​អ្នក​ទេសចរណ៍​អន្តរជាតិ​ទាំង ៤​ខាង​លើ​នេះ នឹង​ចាប់​ផ្ដើម​បើក​ការដ្ឋាន​ចាប់​ពី​ឆ្នាំ ២០១៥ និង​បញ្ចប់​ជា​ស្ថាពរ​នៅឆ្នាំ ២០២៥ខាងមុខ។

រដ្ឋបាល​អាកាសចរណ៍​ស៊ីវិល​វៀតណាម ​ដដែល​បាន​សង្កត់​ធ្ងន់​ទៀត​ថា មិន​ត្រឹម​តែ​ផែនការ​ពង្រីក​វិសាលភាព​ជើង​ហោះហើរ​ដែន​អាកាស​របស់​ខ្លួន​ប៉ុណ្ណោះ​ទេ ប៉ុន្តែ​ប្រទេស​នេះ ​ក៏​ប្រកាស​ទៀត​ថា​គេ​នឹង​បើក​យានដ្ឋាន​ជួសជុល និង​ថែទាំ​យន្តហោះ​ដោយ​ខ្លួន​ឯង យ៉ាង​យូរ​ត្រឹម​ឆ្នាំ២០២០។

យោង​តាម​លិខិត​​ដែល​ចេញ​ផ្សាយ​ដោយ​នាយករដ្ឋមន្ត្រី​វៀតណាម ចុះ​ថ្ងៃ​ទី ៨ មករា ២០០៩ បាន​សរសេរ​ថា ត្រឹម​ឆ្នាំ ២០២០ វៀតណាម​គួរ​តែ​មាន អាកាសយានដ្ឋាន​យ៉ាង​ហោច ២៦ ដែល​ក្នុង​នោះ ១០​អាកាសយានដ្ឋាន សម្រាប់​ជើង​ហោះហើរ​អន្តរជាតិ ៕

ប្រភព៖ Sabay