ភ្នំពេញ៖ លោកវរសេនីយ៍ត្រី ចេវ ហាក់ អនុប្រធានការិយាល័យនគរបាលចរាចរណ៍ផ្លូវគោគផ្ដល់ការណែនាំខ្លះចំពោះបញ្ហាការឈប់ភ្លើងស្តុបពេលយប់ដោយសុវត្ថិភាព។
លោកនិយាយថាចំពោះសុវត្ថិភាពចរាចរណ៍ការគោរពច្បាប់គឺជាការងារដែលប្រជាពលរដ្ឋទាំងអស់ត្រូវធ្វើមិនថាជាពេលថ្ងៃ ឬពេលយប់នោះទេព្រោះភ្លើងសញ្ញានិងស្លាកសញ្ញាចរាចរណ៍ដែលមាននៅលើដងផ្លូវគឺអ្នកប្រើប្រាស់ទាំងអស់ត្រូវតែគោរពជាដាច់ខាត។
លោកពន្យល់ថា៖ «ជាទូទៅខណៈពេលភ្លើងពណ៌លឿងលោតភ្លឹបភ្លែតនៅពេលយប់យើងអាចបន្ដដំណើរទៅបានដោយត្រូវតែប្រុងប្រយ័ត្ន។ប៉ុន្ដែបើសិនជាភ្លើងក្រហមឬភ្លើងខៀវអ្នកធ្វើដំណើរលើដងផ្លូវដាច់ខាតត្រូវតែគោរព»។
លោកបានបន្ថែមថាកាលណាយើងមិនឈប់ពេលភ្លើងស្ដុបគឺប្រឆាំងនឹងអ្នកមកពីទិសម្ខាងទៀតដែលកំពុងធ្វើដំណើរដោយមានភ្លើងខៀវអនុញ្ញាតហើយវាអាចបណ្ដាលឲ្យមានគ្រោះថ្នាក់ដែលកើតឡើងពីការមិនគោរពច្បាប់ចរាចរណ៍ស្លាកសញ្ញានិងភ្លើងសញ្ញា។
តាមការសង្កេតផ្ទាល់ លោកយល់ឃើញថា៖ «ចរាចរណ៍ពេលយប់និងពេលថ្ងៃមានភាពខុសគ្នាដោយសារតែអ្នកបើកបរភាគច្រើនបើកល្បឿនលឿនហើយចរាចរណ៍នៅលើដងផ្លូវនានានៅពេលយប់មិនសូវមានភាពមមាញឹកដូចពេលថ្ងៃ»។
សម្រាប់រូបលោកផ្ទាល់ និងនគរបាលចរាចរដទៃទៀតត្រូវមានប្ដូរវេនគ្នាយាមល្បាតពេលយប់នៅតាមផ្លូវសំខាន់ៗដែលមានការកកស្ទះចរាចរណ៍ឬក៏នៅកន្លែងដែលឧស្សាហ៍មានគ្រោះថ្នាក់ចរាចរណ៍ញឹកញាប់។
ចំណែកឯនៅផ្លូវតូចមិនមានប្រចាំការនៅពេលយប់ដល់ទៀបភ្លឺទេ។
លោកបានបង្ហាញទិន្នន័យខាងការិយាល័យថា៖ «យោងតាមតួលេខ បានឲ្យដឹងថាអ្នករងគ្រោះដោយសារគ្រោះថ្នាក់ចរាចរណ៍យុវវ័យមានអាយុចាប់ពី១៥ដល់២៩ឆ្នាំដែលខ្ពស់ទៅដល់លើស៥០ភាគរយក្នុងចំណោមអ្នករងគ្រោះទាំងអស់ដោយហេតុថាបច្ចុប្បន្នយុវជនមួយចំនួនពុំមានសុជីវធម៌ក្នុងការបើកបរ ឡើយ»។
លោកបានបញ្ជាក់ថាការសេពគ្រឿងស្រវឹងក៏ជាកត្តាមួយដែលជំរុញឲ្យមានគ្រោះថ្នាក់ចរាចរណ៍ដែរ។សូមគោរពច្បាប់ចរាចរណ៍ឲ្យបានខ្ជាប់ខ្ជួនទោះបីនៅពេលយប់ឬពេលថ្ងៃក៏ដោយ។
ជាចុងក្រោយលោកបានអះអាងថា៖ «យុវជនគឺជាឆ្អឹងខ្នងរបស់ប្រទេសជាតិបើប្អូនៗមិនគោរពច្បាប់តើប្អូនៗទៅទ្រទ្រង់ប្រទេសជាតិយ៉ាងម៉េច? ប្អូនៗគួរធ្វើជាគំរូក្នុងការគោរពច្បាប់និងធ្វើយ៉ាងណាឲ្យមានឈ្មោះថា ជាប្រជាពលរដ្ឋម្នាក់ដែលរស់នៅក្នុងសង្គមមានច្បាប់»៕
ប្រភព៖ ភ្នំពេញប៉ុស្តិ៍
