អាជ្ញាធរខ្មែរ និងថៃ នៅព្រឹកថ្ងៃចន្ទ បានប្រឈមមុខដាក់គ្នា ដោយភាគីខ្មែរចោទប្រកាន់ជនជាតិថៃថា បានលួចចូលជួសជុលផ្លូវនៅលើទឹកដីខ្មែរដោយខុស ច្បាប់ នៅតំបន់ច្រកព្រំដែនកម្ពុជា-ថៃ ក្នុងខេត្តឧត្តមានជ័យ។
ប្រជាពលរដ្ឋអ្នកសារព័ត៌មានរបស់VOD ប្រចាំខេត្តឧត្តរមានជ័យ លោក លី ណាម រាយការណ៍ថាកាលពីយប់ថ្ងៃទី១៣ ឈានចូលថ្ងៃទី១៤ ខែតុលា ភាគីថៃ បានបិទច្រកព្រំដែនខ្មែរ-ថៃ ហើយលួចដឹកគ្រឿងចក្រចូលមកខ្មែរនៅពេលយប់ ដោយហេតុផលថាជួសជុលផ្លូវ។ ហេតុការណ៍នេះបានកើតឡើងនៅ ភូមិជើងភ្នំ ឃុំត្រពាំងព្រៃ ស្រុកអន្លង់វែង ខេត្តឧត្តរមានជ័យ នៅច្រកព្រំដែនខ្មែរថៃ ដែលគេហៅថា ច្រកជាំស្រងាំ។
លោក លី ណាម បន្តថា ភាគីកម្ពុជា បានអះអាងថា ការជួសជុលផ្លូវរបស់ភាគីថៃនៅកម្ពុជា ហួសព្រំដែន ដែលឈានដល់តំបន់ហាមឃាត់។ លោកបន្តថា ទីប្រឹក្សារបស់នាយករដ្ឋមន្ត្រី និងជាអគ្គមេបញ្ជាការរងកងទ័ពជើងគោក និងជាមេបញ្ជាការយោធភូមិភាគទិសទី៤ លោក ជា ម៉ន នៅព្រឹកថ្ងៃទី១៤ ខែតុលា វេលាម៉ោង៩ បានទៅអន្តរាគមន៍នៅកន្លែងកើតហេតុ ដោយមានទាហានខ្មែរប្រមាណ ៥០នាក់ បានចរចា ហើយភាគីថៃសម្រេចត្រឡប់ទៅវិញ។
បន្ទាប់ពីហេតុការណ៍នេះ បានបញ្ចប់ ស្ថានភាពនៅតំបន់នោះ មានសភាពធម្មតា ហើយអ្នកទេសចរជាតិ និង អន្តរជាតិ បាមធ្វើដំណើរឆ្លងកាត់ច្រកព្រំដែនជាធម្មតា។
កាសែតបាងកកប៉ុស្តិ៍របស់ថៃ រាយការណ៍នៅថ្ងៃចន្ទនេះថា ភាគីកម្ពុជា បានតវ៉ា និងស្នើឲ្យអាជ្ញាធរថៃ បញ្ឈប់ការជួសជុលផ្លូវនៅតំបន់ក្បែរព្រំដែន។កាសែតបន្តថា ការងារផ្លូវជួសជុលនោះ មានប្រវែង៤០០ម៉ែត្រនៃផ្នែកព្រំដែនថៃ និង១០០ម៉ែត្រពីប៉ុស្តិ៍គយរបស់កម្ពុជា៕
ប្រភព៖ VOD
