ភ្នំពេញ ៖ អេស្កាវ៉ាទ័រក្រុមហ៊ុនលី ឈួង អ្នកបើកបរមិនប្រយ័ត្នបង្កគ្រោះ ថ្នាក់ចរាចរដោយបុកទៅលើរថយន្តកាមរី ស៊េរីឆ្នាំ២០១៣មួយគ្រឿង បណ្ដាលឲ្យ ខូចខាតយ៉ាងដំណំ ខណៈជាន់ហ្វ្រាំងមិនទាន់ ពេលដែលម៉ូតូនិងរថយន្តមួយគ្រឿង ផ្សេងទៀតបើកកាត់ពីមុខ។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង២និង ២៥នាទីរសៀល ថ្ងៃទី១៥ ខែតុលា ឆ្នាំ២០១៣ លើកំណាត់ផ្លូវព្រះសីហនុ សង្កាត់ បឹងព្រលិត ខណ្ឌ៧មករា។
សាក្សីបាននិយាយថា មុនពេលកើតហេតុ គេឃើញអេស្កាវ៉ាទ័ររបស់ក្រុម ហ៊ុនលីឈួងបង្កហេតុ និងរថយន្ដកាមរី ហាយប្រ៊ីតរបស់ ជនរងគ្រោះបានធ្វើដំណើរស្របទិសគ្នាពី កើតទៅលិច តាមបណ្ដោយផ្លូវព្រះសីហនុ លុះដល់ចំណុចកែងផ្លូវលេខ១០៧ រថយន្ដកាមរីពណ៌ស ស៊េរីឆ្នាំ២០១៣ ពាក់ស្លាកលេខរដ្ឋ០៦.២-១១៩១ បានវ៉ាក់នឹងម៉ូតូ១គ្រឿងដែល បើកបញ្ច្រាសទិសកាត់មុខ ក៏ជាន់ហ្វ្រាំង ហើយអ្នកបើកបរអេស្កាវ៉ាទ័រដែលមិន មានការប្រុងប្រយ័ត្ន ក៏ជ្រុលចង្កូតមក បុកនឹងរថយន្ដខាងលើនេះមួយទំហឹងចំពីក្រោយ បណ្ដាលឲ្យខូចខាតយ៉ាងដំណំ។
បន្ទាប់ពីកើតហេតុ ភាគីទាំងសងខាង ហាក់ដូចជាមានការតឹងសរសៃកដាក់គ្នា បើទោះជាខាងនគរបាលចរាចរណ៍ ជួយសម្របសម្រួលយ៉ាងណាក៏ដោយ ដោយសារតែភាគីអេស្កាវ៉ាទ័ររបស់ក្រុម ហ៊ុនលីឈួងត្រូវបានគេចាត់ទុកថា មួយរយៈនេះមានឥទ្ធិពលផងដែរក្នុងការបើក ចូលក្រុង ទាំងគ្រឿងចក្រ និងរថយន្ដធុនធ្ងន់ ហើយភាគីជនរងគ្រោះមិនព្រមទទួល យកនូវសំណងមិនសមរម្យ ទើបនគរបាលចរាចរណ៍រាជធានីភ្នំពេញយកទៅ រក្សាទុកនៅសាលារាជធានីភ្នំពេញដើម្បី ធ្វើការដោះស្រាយទៅតាមផ្លូវច្បាប់។
គួររំលឹកថា រថយន្តនិងគ្រឿងចក្រ ក្រុមហ៊ុនលីឈួងដែលបើកក្នុងក្រុងបង្ក បញ្ហាគ្រោះថ្នាក់ចរាចរណ៍ជាញឹកញាប់ ដែលសមត្ថកិច្ចធ្លាប់និយាយថា អ្នក បើកបរពេលខ្លះមិនគោរពច្បាប់ចរាចរណ៍ និងចូលចិត្ដយកអំណាចឥទ្ធិពលពីក្រុម ហ៊ុន ពេលខ្លះស្ទើរតែមិនស្ដាប់ការណែនាំរបស់សមត្ថកិច្ចទៀតផង៕
ប្រភព៖ កម្ពុជាថ្មី
