ភ្នំពេញ ៖ យ៉ាងហោចណាស់មនុស្សម្នាក់បានស្លាប់នៅនិងកន្លែងកើតហេតុ និង២នាក់ផ្សេងទៀតបានរងរបួសធ្ងន់ក្នុងឧបទ្ទវហេតុគ្រោះថ្នាក់ចរាចរណ៏ដែលបានបង្កឡើងដោយរថយន្តដឹកសំរាមរបស់ក្រុមហ៊ុនស៊ីនទ្រីតែរយៈពេល១ម៉ោងប៉ុណ្ណោះ នៅតាមបណ្តោយផ្លូវលេខ២១៧ កាលពីវេលាម៉ោង១៥និង៥នាទី ស្ត្រីម្នាក់របួសធ្ងន់ក្បាលបញ្ជូនទៅសង្គ្រោះស្ថិតក្នុងភូមិសំបួរ សង្កាត់ដង្កោ និងមួយករណីទៀតកើតឡើងនៅវេលាម៉ោង១៦និង២០នាទីស្ថិតនៅភូមិបុរីកម្មករសង្កាត់ជើងឯក ខណ្ឌដង្កោរាជធានីភ្នំពេញ ថ្ងៃទី៣០ ខែតុលា ឆ្នាំ២០១៣។
នាយរងផ្នែកចរាចរណ៏ខណ្ឌដង្កោលោក ប៉ែន រ៉ាហ៊ុល បានប្រាប់ឲ្យដឹងថា រថយន្តដឹកសំរាមរបស់ក្រុមហ៊ុនស៊ីនទ្រីបានបង្កគ្រោះថ្នាក់ចរាចរបណ្តាលឲ្យស្លាប់ម្នាក់ពេលបញ្ជូនដល់មន្ទីរពេទ្យ និង២នាក់ផ្សេងទៀតរបួសធ្ងន់នៅតាមបណ្តោយផ្លូវ២១៧កន្លែងផ្សេងគ្នាក្នុងខណ្ឌដង្កោ។ លោកបន្តថា ករណីគ្រោះថ្នាក់ចរាចរលើកទី១មួយបានកើតឡើងនៅភូមិសំបួរ បណ្តាលឲ្យស្ត្រីម្នាក់រងរបួសធ្ងន់មានឈ្មោះ អាល័ក្ខ អាយុ២៧ឆ្នាំ ជាកម្មការិនីរោងចក្រកាត់ដេរ (របួសស្រាល) និងស្ត្រីម្នាក់ទៀតមានឈ្មោះ អាជី អាយុ២២ឆ្នាំ(របួសធ្ងន់)ស្នាក់នៅផ្ទះជួលក្នុង សង្កាត់បឹងទំពន់ ខណ្ឌមានជ័យរាជធានីភ្នំពេញ។ស្ត្រីរងគ្រោះពីរនាក់បងប្អូននេះជិះម៉ូតូមួយគ្រឿងម៉ាកហ្វីណូពណ៌ខ្មៅ ពាក់ស្លាកលេខភ្នំពេញ1AJ-8890។ ចំណែករថយន្តបង្កហេតុជា រថយន្តដឹកសំរាមរបស់ក្រុមហ៊ុនស៊ីនទ្រីគ្មានស្លាកលេខមានលេខរៀង២០០បើកបរដោយឈ្មោះមន នាង ភេទប្រុស អាយុ២៥ឆ្នាំ ស្នាក់នៅផ្ទះជួលម្តុំចំការដូង ភូមិខ្វា សង្កាត់-ខណ្ឌដង្កោ។លោក ប៉ែន រ៉ាហ៊ុល បន្តឲ្យដឹងទៀតថា មុនពេលកើតហេតុរថយន្តបង្កហេតុបានបើកបរពីជើងទៅត្បូងស្របទិសគ្នាជាមួយជនរងគ្រោះ លុះមកដល់កន្លែងកើតហេតុរថយន្តក៏បើកកៀរជនរងគ្រោះតែម្តង។ ក្រោយកើតហេតុទាំងរថយន្តនិងអ្នកបើកបរត្រូវបានឃាត់ខ្លួន។
ដោយឡែកករណីគ្រោះថ្នាក់ចរាចរណ៏មួយករណីផ្សេងទៀតបណ្តាលឲ្យស្លាប់ម្នាក់នៅ ដឹកបញ្ជូនដល់មន្ទីរពេទ្យ និងម្នាក់ទៀតរងរបួសធ្ងន់សន្លប់ដែលបានបង្កឡើងដោយរថយន្តដឹកសំរាមរបស់ក្រុមហ៊ុនស៊ីនទ្រីដដែលកាលពីវេលាម៉ោង១៦និង២០នាទីថ្ងៃទី៣០ខែតុលាឆ្នាំ២០១៣នៅមុខ វិទ្យាល័យទួលអំពិល ផ្លូវ២១៧ ភូមិបុរីកម្មករ សង្កាត់ជើងឯក ខណ្ឌដង្កោរាជធានីភ្នំពេញ។លោកប៉ែន រ៉ាហ៊ុល ក៏បានបញ្ជាក់ឲ្យដឹងដែរថា ជនរងគ្រោះមានឈ្មោះស្រ៊ុយ ភេទប្រុស អាយុជាង២០ឆ្នាំ(ស្លាប់) និងជនរងគ្រោះម្នាក់ទៀតមានឈ្មោះវុធ ភេទប្រុស អាយុ២៥ឆ្នាំ មុខរបរអ្នកបើកឡានដឹកកម្មករ និងមានទីលំនៅភូមិកណ្តោក ឃុំកណ្តោក ស្រុកកណ្តាលស្ទឹង ខេត្តកណ្តាល។ ជនរងគ្រោះជិះម៉ូតូមួយគ្រឿងម៉ាកសង់កូរ៉េ ពណ៌ក្រហម គ្មានស្លាកលេខ។ ចំណែករថយន្តបង្កហេតុជារថយន្តដឹកសំរាមរបស់ក្រុមហ៊ុនស៊ីនទ្រីគ្មានស្លាកលេខនិង មានលេខ២៤១ បើកបរដោយឈ្មោះផ័ន ឃន់ ភេទប្រុស អាយុ៣០ឆ្នាំ មានទីលំនៅផ្ទះជួល នៅក្បែរយានដ្ឋានរថយន្តក្រុមហ៊ុនស៊ីនទ្រី។
នាយរងផ្នែកចរាចរខណ្ឌដង្កោដដែលបញ្ជាក់ឲ្យដឹងទៀតថា មុនពេលកើតហេតុប្រជាពលរដ្ឋគាត់បានឃើញជនរងគ្រោះពីរនាក់ជិះម៉ូតូយ៉ាងលឿនជើងទៅត្បូងតាមផ្លូវ២១៧នេះ លុះជិះមកដល់មុខវិទ្យាល័យទួលអំពិលក៏ជ្រុលទៅប៉ះនិងរថយន្តដឹកសំរាមដែលបានបើកមក ពីត្បូងបណ្តាលឲ្យដួលបោកក្បាលហូរឈាមតាមច្រមុះក្បាលជោគជាំពេញផ្ទៃមុខស្លាប់ពេល ដឹកទៅដល់មន្ទីរពេទ្យ និងជនរងគ្រោះម្នាក់ទៀតសន្លប់ឈឹងមួយសន្ទុះ។លោកបន្តថា រថយន្តបង្កហេតុនិងអ្នកបើកបរត្រូវបានប្រគល់ទៅរក្សាទុកនៅការិយាល័យចរាចរណ៏ផ្លូវគោកនៃស្នងការដ្ឋាននគរបាលរាជធានីភ្នំពេញ។
ជាមួយគ្នានេះផងដែរប្រជាពលរដ្ឋដែលចោមរោមឈរមើលក្នុងហេតុការណ៏នេះបានរិះគន់ថា ក្រុមអ្នកបើកបររថយន្តដឹកសំរាមរបស់ក្រុមហ៊ុនស៊ីនទ្រីនេះបើកបរព្រហើនណាស់មិនចេះគោរពច្បាប់ចរាចរទេ ហើយក៏គ្មានសុជីវធម៌ដែរបើកបរស៊ីភ្លេថ្លង់រំខានដល់ពលរដ្ឋធ្វើដំណើរតាមដងផ្លូវ ហើយជាពិសេសហេតុអ្វីរថយន្តដឹកសំរាមនេះមិនដែលមានពាក់ស្លាកលេខ និងគ្មានឆៀកគ្មានពន្ធផ្លូវ។ ប្រជាពលរដ្ឋក៏សុំខាងស្ថាប័ននាយកដ្ឋានកណ្តាលសណ្តាប់ធ្នាប់នៃអគ្គស្នងការដ្ឋាននគរបាលជាតិក្រសួងមហាផ្ទៃ គួរណាស់ពិនិត្យមើលនិងរឹតបន្តឹងចំពោះអ្នកបើកបរនិងក្រុមហ៊ុនស៊ីនទ្រីនេះផង៕
ប្រភព៖ កម្ពុជាថ្មី
