ភ្នំពេញ ៖ នារីជាកម្មករកាត់ដេរម្នាក់បានរត់តាមសង្សារបាត់មុនថ្ងៃកំណត់ចូលរោងការនឹងមកដល់នៅថ្ងៃទី១៧តុលានេះ បើទោះបីបងប្អូនខំដើររក ឬទូរសព្ទ័យ៉ាងណាក៏ដោយក៏មិនទាក់ទងបានដែរ។ ឯគូដណ្តឹងនិងក្រុមគ្រួសារខាងប្រុសមានតែការ សោកស្ដាយ ដោយសារតែនាងជាគូដណ្ដឹងមានសម្រស់ដ៏ស្រស់ស្អាតម្នាក់រត់ចោលបាត់។ បងប្អូនខាងកូនក្រមុំបាននាំគ្នាមកដាក់ពាក្យបណ្តឹងនៅប៉ុស្តិ៍ទួលសង្កែ ដើម្បីឲ្យជួយរករូបនាងផងដែរកាលពីព្រឹកថ្ងៃទី១៥ ខែតុលា ឆ្នាំ២០១៣នេះ។
បើតាមឈ្មោះ ឈូក ធា ហៅ សារុន អាយុ២៤ឆ្នាំ ត្រូវជាបងប្រុសបង្កើតរបស់នារីដែលរត់ចោលរោងការនោះបាននិយាយថា ប្អូនស្រីរបស់ខ្លួនឈ្មោះ ឈូក ម៉ាលីស ហៅសារិន អាយុ១៧ឆ្នាំ ជាកម្មករកាត់ដេរនៅរោងចក្រ ស៊ីងឆាងស៊ីង សង្កាត់ទួលសង្កែ ខណ្ឌឫស្សីកែវ សព្វថ្ងៃស្នាក់នៅផ្ទះជួល ភូមិ-សង្កាត់ទួលសង្កែ ខណ្ឌឫស្សីកែវ មានស្រុកកំណើតនៅស្រុកកំពង់ត្រាច ខេត្តកំពត។
ឈ្មោះ ឈូក ធា បានឱ្យដឹងទៀតថា ប្អូនស្រីរបស់ខ្លួនត្រូវបានបងប្រុសជីដូនមួយចូលស្តីដណ្តឹង ហើយគូដណ្តឹងនេះនឹងក្លាយជាគូស្វាមី ភរិយានៅរយៈពេលតែ២ថ្ងៃទៀតខាងមុខនេះ ពោលគឺ ពួកគេត្រូវចូលរោងការនៅថ្ងៃទី១៧តុលាឆ្នាំ២០១៣ នៅស្រុកកំពង់ត្រាច ខេត្តកំពត ប៉ុន្តែស្រាប់តែនៅវេលាម៉ោង១២និង៣០នាទីថ្ងៃទី១៤ ខែតុលា ឆ្នាំ២០១៣ នាងបានវិចបង្វិចរត់តាមសង្សារបាត់ស្រមោលមិនដឹងទៅដល់ទីណា ។ ប្រភពបន្តថា រយៈពេលជាង២ខែមកហើយ ដែលខ្លួនដឹងថាប្អូនស្រីរបស់ខ្លួនមានទំនាក់ទំនង ស្នេហាជាមួយយុវជនម្នាក់ឈ្មោះ សិដ្ឋ អាយុ២១ឆ្នាំ ជាកម្មករកាត់ដេរនៅរោងចក្រ ជាមួយគ្នា ដោយឈ្មោះសិដ្ឋបានជួលផ្ទះនៅខាងក្រោយវត្តទួលសង្កែ ភូមិ-សង្កាត់ទួលសង្កែ ខណ្ឌឫស្សីកែវ។
ខណៈពេលដែលបាត់នាងចេញពីផ្ទះជួលខ្លួនក៏បានតាមរកនៅផ្ទះជួលរបស់ឈ្មោះសិដ្ឋដែរ តែគេបានចេញបាត់ពីផ្ទះដូចគ្នា ។ ប្រភពខាងលើបន្តទៀតថា នាងនិងគូដណ្តឹងគឺជាបងប្អូនជីដូន មួយនឹងគ្នា ហើយកន្លងមករវាងពួកគេទាំង២នាក់មិនដែលមានរឿងអ្វីនឹងគ្នានោះទេ ពោលគឺនាងមិនដែលប្រកែកពីបំណងចាស់ទុំដែលបានផ្សំផ្គុំឱ្យនាងបានគ្នាជាគូអនាគតនោះទេ ។ តែកំហុសប្រហែលមកពីអ្នកទី៣នេះដែលមកប្រឡូកប្រឡាក់ បំបែកបំបាក់ជ្រៀតជ្រែក ចំណងអាពាហ៍ ពិពាហ៍ របស់ពួកគេទាំង២នាក់ ។
ក្រុមគ្រួសាររបស់នាងបានអំពាវនាវដល់នាងឈូក ម៉ាលីស បើដឹងដំណឹងនេះសូមវិលត្រឡប់ មកវិញកុំធ្វើបែបនេះទៀតនាំឱ្យខូចកិត្តិយសគ្រួសារ៕
ប្រភព៖ កម្ពុជាថ្មី
