កំពត ៖ យ៉ាងហោចណាស់មានមនុស្ស៣នាក់បានរងរបួសធ្ងន់ដោយសារឧប្បត្តិហេតុគ្រោះថ្នាក់ចរាចរណ៍រវាងម៉ូតូធំបុកជាមួយម៉ូតូសង់សេ១២៥យ៉ាងពេញទំហឹងក្នុងទិសដៅបញ្ច្រាសគ្នា។ ហេតុការណ៍គ្រោះថ្នាក់ចរាចរនេះបានកើតឡើងកាលពីវេលាម៉ោង៧និង៤០នាទីព្រឹកថ្ងៃទី១៨ ខែតុលា ឆ្នាំ២០១៣ លើកំណាត់ផ្លូវជាតិទៅរមណីយដ្ឋានទឹកឈូ ស្ថិតនៅក្នុងភូមិអូរតូច សង្កាត់អណ្ដូងខ្មែរ ក្រុងកំពត ខេត្តកំពត។
បើតាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលមានករណីគ្រោះថ្នាក់ចរាចរនេះ គេបានឃើញម៉ូតូសង់សេ១២៥មួយគ្រឿងបើកឌុបគ្នាពីរនាក់ប្ដីប្រពន្ធពីត្បូងមកជើង លុះមកដល់ចំណុចកើតហេតុស្រាប់តែម៉ូតូសង់បានបើកភ្លើងស៊ីញ៉ូបត់ចូលផ្ទះ ខណៈពេលនោះក៏មានម៉ូតូធំបើកបរដោយជនជាតិបរទេសយ៉ាងលឿនពីជើងមកត្បូងទិសដៅបញ្ច្រាសគ្នា បានវ៉ាឡានដឹកដីនៅពីមុខ ក៏ជ្រុលទៅបុកម៉ូតូពីរនាក់ប្ដីប្រពន្ធចំពីមុខពេញទំហឹងតែម្ដង។
មន្ត្រីប៉ូលិសបានឲ្យដឹងថា គ្រោះថ្នាក់ចរាចរនេះគឺបង្កឡើងដោយសារតែម៉ូតូធំបុកចំពីមុខម៉ូតូសង់បណ្ដាលមនុស្ស៣នាក់របួសធ្ងន់ត្រូវបានដឹកទៅសង្គ្រោះនៅមន្ទីរពេទ្យបង្អែកខេត្តកំពត។ ចំណែកម៉ូតូទាំងពីរត្រូវបានសមត្ថកិច្ចវាស់វែងរួចយកមកកាន់អធិការដ្ឋាននគរបាលក្រុងរង់ចាំធ្វើការដោះស្រាយតាមច្បាប់៕
ប្រភព៖ កម្ពុជាថ្មី
