នៅថ្ងៃទី២៦ ខែតុលា ឆ្នាំ២០១៣ វេលាម៉ោង៩និង៣០នាទីព្រឹក មានឧប្បត្តិហេតុគ្រោះថ្នាក់ចរាចរ ដែលស្ថិតនៅចំណុចអូត្រជាក់ចិត្ត ភូមិស្រែត្រាវ ឃុំថ្មស ស្រុកបូទុមសាគរ ខេត្តកោះកុងបានបណ្តាលអោយបុរសម្នាក់បានរងរបួសធ្ងន់ធ្ងរនិងបានស្លាប់ពេលបញ្ជូនដល់មន្ទីរពេទ្យ។
តាមប្រភពព័ត៌មានពីសមត្ថកិច្ចនគរបាលប៉ុស្តិ៍ថ្មសបានអោយដឹងថា ជនរងគ្រោះមានឈ្មោះ អ៊ុក វន្ត័ ភេទប្រុស អាយុ៥៨ឆ្នាំ មានមុខរបរជាពេទ្យដើរព្យាបាលតាមភូមិ មានទីលំនៅស្ថិតនៅភូមិថ្មស ឃុំថ្មស ស្រុកបូទុមសាគរ ខេត្តកោះកុង។សមត្ថកិច្ចបានបន្តទៀតថា ជនរងគ្រោះខាងលើត្រូវបានប្រជាពលរដ្ឋរស់នៅក្នុងភូមិស្រែថ្មី ឃុំថ្មស ស្រុកបូទុមសាគរ ខេត្តកោះកុង បានទូស័ព្ទហៅទៅពិនិត្យជំងឺនៅផ្ទះពេលពិនិត្យអ្នកជំងឺ រួចហើយជនរងគ្រោះបានធ្វើដំណើរពីភូមិស្រែថ្មីត្រលប់មកផ្ទះវិញដោយបានជិះម៉ូតូម៉ាកសេ១២៥ពណ៌ខ្មៅ ពាក់ស្លាកលេខកំពង់ចាម 1C 0653 លុះមកដល់ចំណុចកើតហេតុខាងលើជនរងគ្រោះបានជួបនិងគ្រោះថ្នាក់ចរាចរ ដោយបានជិះម៉ូតូគេចពីដុំថ្មនៅលើផ្លូវនិងបានចាប់ហ្វ្រាំងមុខ តែដោយសារតែស្ថានភាពផ្លូវក្រាលក្រួសក្រហមទើបបណ្តាលអោយរអិលដួលបោកក្បាលទៅលើថ្នល់ចំពីមុខឆៀងខាងស្តាំ បណ្តាលអោយរងរបួសធ្ងន់ធ្ងរនិងបានស្លាប់ពេលបញ្ជូនដល់មន្ទីរពេទ្យ។បន្ទាប់មកសមត្ថកិច្ចនគរបាលបានចុះទៅពិនិត្យកន្លែងកើតហេតុនិងពិនិត្យសព រួចហើយសមត្ថកិច្ចក៏បានប្រគល់សពជនរងគ្រោះទៅអោយក្រុមគ្រួសារដើម្បីយកទៅធ្វើបុណ្យតាមប្រពៃណីខ្មែរនៅផ្ទះរបស់ជនរងគ្រោះទៅ៕
ប្រភព៖ កម្ពុជាថ្មី
