.jpg)
ខេត្តកំពត: ក្រោយលិចបាត់អស់រយៈពេលពីរថ្ងៃពីរយប់ សពយុវជនម្នាក់ ដែលលិចបាត់ ដោយសារតែកម្លាំងទឹកកួច នៅក្នុងជ្រោះទឹកឈូ នាវេលាថ្ងៃត្រង់ ថ្ងៃទី១៨ ខែតុលា ឆ្នាំ២០១៣ សពយុវជនម្នាក់ បានអណ្តែតឡើង នៅចម្ងាយប្រមាណ ប្រហែលមួយគីឡូម៉ែត្រ ពីទីកើតហេតុ។
គួររំលឹកថា កាលពីរសៀលថ្ងៃទី១៦ ខែតុលា ឆ្នាំ២០១៣ យុវជនម្នាក់ បានលិចបាត់ចូលទៅក្នុងទឹក នៅរមណីយដ្ឋានធម្មជាតិទឹកឈូ ស្ថិតក្នុងភូមិស្នំប្រាំពីរ ឃុំម៉ាក់ប្រាង ស្រុកទឹកឈូ ខេត្តកំពត។
ជនរងគ្រោះ ត្រូវអ្នកផងសន្និដ្ឋានថា បានបាត់បង់ជីវិត ហើយចាត់ចែងស្វែងរកអស់ពីសមត្ថភាព។ រហូតដល់ពីរថ្ងៃពីរយប់ មិនអាចរកឃើញ ពោលគឺទើបតែនៅវេលាថ្ងៃត្រង់ថ្ងៃទី១៨ ខែតុលា ឆ្នាំ២០១៣ ទើបប្រទះសពអណ្តែតឡើង នៅខាងក្រោមខ្សែទឹក ចម្ងាយប្រមាណប្រហែលមួយគីឡូម៉ែត្រ ពីកន្លែងកើតហេតុ ដែលស្ថិតក្បែរទំនប់បង្ហៀរទឹក របស់ក្រុមហ៊ុនស៊ីណូហាយដ្រូកំចាយ ផលិតថាមពលវារីអគ្គិសនី។
ជនរងគ្រោះ ឈ្មោះ រ៉ុង ប៉ាលី អាយុ ១៦ឆ្នាំ មានស្រុកកំណើតនៅស្រុកបាធាយ ខេត្តកំពង់ចាម តែមកស្នាក់នៅ និងសិក្សាក្នុងរាជធានីភ្នំពេញ៕
.jpg)
.jpg)
ប្រភព៖ CEN
