 |
| លោក គឹម សុខា អនុប្រធាន CNRP |
ប្រសិនបើ ថ្នាក់ដឹកនាំគណបក្សសង្គ្រោះជាតិទទួលបានការអនុញ្ញាតពីព្រះបរមរាជវាំង អោយថ្នាក់ដឹកនាំសង្គ្រោះជាតិចូលរួមក្នុងព្រះរាជពិធីបង្សុកូលថ្វាយព្រះវិញ្ញាណក្ខន្ធព្រះបរមរតនកោដ្ឋក្នុងព្រះបរមរាជវាំងនៅព្រឹកថ្ងៃទី១៥តុលាដែរនោះ គណបក្សសង្គ្រោះជាតិនឹងបានធ្វើពិធីបង្សុកូលនេះ២ដង។ ពីព្រោះនៅព្រឹកថ្ងៃចន្ទទី១៤តុលា គណបក្សសង្គ្រោះជាតិក៏នឹងរៀបចំពិធីបង្សុកូលនេះនៅទីស្នាក់ការគណបក្សក្នុងខណ្ឌទួលគោកដែរ។
មន្ត្រីជាន់ខ្ពស់គណបក្សសង្គ្រោះជាតិ លោកយ៉ែម បុញ្ញរិទ្ធបានប្រាប់គេហទំព័រថ្មីៗនៅល្ងាចថ្ងៃអាទិត្យនេះថា ពិធីបង្សុកូលឧទ្ទិសដល់ព្រះវិញ្ញាណក្ខន្ធព្រះបរមរតនកោដ្ឋនឹងត្រូវដឹកនាំដោយលោកកឹម សុខា។ «យើងក៏បានស្នើសុំចូលរួមព្រះរាជពិធីបង្សុកូលនៅក្នុងព្រះបរមរាជវាំងនៅព្រឹកថ្ងៃទី១៥ដែរ។ តែខ្ញុំនៅមិនទាន់បានទទួលដំណឹងថា ព្រះបរមរាជវាំងឆ្លើយយ៉ាងណានៅឡើយទេ។ គឺមានតែថ្នាក់ដឹកនាំជាន់ខ្ពស់ ៥ ឬ៦នាក់ប៉ុណ្ណោះទេដែលត្រូវចូលរួមក្នុងព្រះរាជពិធីនោះ ប្រសិនបើយើងទទួលបានការអនុញ្ញាត» នេះបើតាមការបញ្ជាក់របស់លោកយ៉ែម បុញ្ញរិទ្ធ។
តាមពិត ក្រៅពីរៀបចំពិធីបង្សុកូលនៅទីស្នាក់ការគណបក្សនៅព្រឹកថ្ងៃចន្ទទី១៤តុលា គណបក្សសង្គ្រោះជាតិមានគម្រោងស្នើសុំទៅគោរពព្រះបរមរូបព្រះបរមរតនកោដ្ឋនៅរសៀលថ្ងៃចន្ទស្អែកនេះ។ ប៉ុន្តែសំណើរនេះត្រូវបានបដិសេធហើយ។ បើតាមការបញ្ជាក់របស់អ្នកនាំពាក្យគណបក្សសង្គ្រោះជាតិ លោកយ៉ែម បុញ្ញរិទ្ធដដែល នៅរសៀលថ្ងៃចន្ទទី១៤តុលានេះ គណបក្សសង្គ្រោះជាតិនឹងបើកកិច្ចប្រជុំផ្ទៃក្នុងវិញ។ តំណាងរាស្ត្រមណ្ឌលព្រៃវែងរូបនេះប្រាប់អោយដឹងយ៉ាងដូច្នេះថា៖«យើងនឹងពិភាក្សាអំពីការរៀបចំមហាបាតុកម្មថ្ងៃទី២៣តុលា និងគម្រោងរបស់យើងសម្រាប់ពេលខាងមុខទៀត»៕
ប្រភព៖ ThmeyThmey
