 |
| នាយករដ្ឋមន្ត្រីសាធារណរដ្ឋបារាំង លោក ហ្សង់ម៉ាក អៃរ៉ូល |
បារាំង៖ នាយករដ្ឋមន្ត្រីសាធារណរដ្ឋបារាំង លោក ហ្សង់ ម៉ាក អៃរ៉ូល បានភ្ជាប់កិច្ចព្រមព្រៀងសន្តិភាពទីក្រុងប៉ារីស ថ្ងៃ២៣ ខែតុលា ឆ្នាំ១៩៩១ ថា ជាមូលដ្ឋានគ្រឹៈនៃការកសាងលទ្ធិប្រជាធិតេយ្យ និងការអភិវឌ្ឍន៍នៅកម្ពុជា ខណៈលោកសារទរការជ្រើសតាំង លោក ហ៊ុន សែន ជាប្រមុខដឹកនាំរដ្ឋាភិបាលកម្ពុជា មួយអាណត្តិទៀត។
លិខិត លោក ហ្សង់ ម៉ាក អៃរ៉ូល Jean Mare AYRAULT ផ្ញើជូននាយករដ្ឋមន្ត្រីខ្មែរ លោក ហ៊ុន សែន កាលពីថ្ងៃទី៤ ខែតុលា ដែលទើបនឹងចុះផ្សាយលើគេហទំព័រក្រសួងការបរទេសកម្ពុជា នាថ្ងៃសៅរ៍ទី១២ម្សិលមិញ ឲ្យដឹងថា បារាំងសាទរនឹងលោកនាយករដ្ឋមន្ត្រី ហ៊ុន សែន ដែលបានជាប់ឆ្នោតថ្មីទៀត ជាប្រមុខរាជរដ្ឋាភិបាលកម្ពុជា ក្រោយការបោះឆ្នោត។ បារាំងបានអះអាងថា ជានិច្ចជាកាលបារាំងតែងនៅជាមួយកម្ពុជាជានិច្ច។
លោក ហ្សង់ ម៉ាក អៃរ៉ូល បានវាយតម្លៃថា ការបោះឆ្នោតសភានៅកម្ពុជា កាលពីខែកក្កដា បានបង្ហាញឲ្យឃើញពីការចូលរួមយ៉ាងច្រើនពីសំណាក់អ្នកបោះឆ្នោត និងជាការសំខាន់ណាស់ ដែលអ្នកនយោបាយកម្ពុជាទាំងអស់ធ្វើការជាមួយគ្នាចាប់ពីពេលនេះតទៅ ដើម្បីធានានូវការប្រព្រឹត្តទៅដោយរលូននៃស្ថាប័ន ដែលជាកត្តាមិនអាចខ្វះបានសំរាប់លទ្ធិប្រជាធិបតេយ្យ និងការអភិវឌ្ឍន៍ប្រទេស។
នាយករដ្ឋមន្ត្រីបារាំង បន្តថា ចាប់តាំងពីកិច្ចព្រមព្រៀងសន្តិភាព ក្រុងប៉ារីសឆ្នាំ១៩៩១ មានសមិទ្ធិផលដ៏គួរឲ្យកត់សម្គាល់ជាច្រើនត្រូវបានសម្រេច។
ទោះជាយ៉ាងណាលោកនាយករដ្ឋមន្ត្រី ហ៊ុន សែន ធ្លាប់អះអាងថា កិច្ចព្រមព្រៀងសន្តិភាពទីក្រុងប៉ារីស សម្រាប់កម្ពុជាបច្ចុប្បន្ននេះ លែងមានសុពលភាពទៀតហើយ ចាប់ពីកម្ពុជាបានបង្កើតរដ្ឋធម្មនុញ្ញ រួចមក។
ប្រទេសបារាំងជាភាគីហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសមួយរូបដែរ បានសរសេរក្នុងលិខិតនោះទៀតថា សមិទ្ធផលជាច្រើន និងចំណងមិត្តភាពរបស់បារាំង និងកម្ពុជា កើតឡើងចាប់តាំងពីកិច្ចព្រមព្រៀងសន្តិភាពទីក្រុងប៉ារីស ១៩៩១៕
ប្រភព៖ VOD
