ឧត្តរមានជ័យ ៖ កុមារីអាយុ៥ឆ្នាំម្នាក់បានសន្លប់ស្ដូកស្ដឹងនៅកន្លែងកើតហេតុ បន្ទាប់រថយន្តកាមរីបាឡែនបើកបុក រួចព្យាយាមរត់គេចខ្លួន តែត្រូវសមត្ថកិច្ចដេញស្ទាក់ចាប់បានវិញ។
ហេតុការណ៍នេះបានកើតឡើងនៅវេលាម៉ោង១រសៀល ថ្ងៃទី២០ ខែតុលា ឆ្នាំ២០១៣ នៅចំណុចក្បាលស្ពាន ស្ថិតក្នុងភូមិបន្ទាយចាស់ ឃុំព្រះប្រឡាយ ស្រុកត្រពាំងប្រសាទ ខេត្តឧត្តរមានជ័យ ហើយនៅវេលាម៉ោង២និង២០នាទីថ្ងៃដដែលត្រូវបានសមត្ថកិច្ចឃាត់បាននៅចំណុចស្ពានអូរតាខៀវ ព្រំប្រទល់ខេត្តឧត្តរមានជ័យរវាងខេត្តព្រះវិហារ។
កុមារីរងគ្រោះឈ្មោះ វ៉ាន់ រច្នី អាយុ៥ឆ្នាំ រស់នៅភូមិបន្ទាយចាស់ ឃុំព្រះប្រឡាយ ស្រុកត្រពាំងប្រាសាទ ខេត្តឧត្តរមានជ័យ បានរងរបួសបែកក្បាលនិងរបួសដៃជើង ត្រូវគេបញ្ជូនទៅសង្គ្រោះភ្លាមៗនៅមន្ទីរពេទ្យបង្អែកស្រុកអន្លង់វែងបន្ទាប់ពីកើតហេតុ។ រីឯរថយន្តបង្កម៉ាកកាមរីបាឡែនពណ៌ស្ករស៊េរីឆ្នាំ២០០៧ពាក់ស្លាកលេខ ភ្នំពេញ២X-៤៣២៣ បានបើកបុកក្មេងស្រីរងគ្រោះពីចំហៀងខណៈពេលដែលកុមារីនោះកំពុងរត់ឆ្លងថ្នល់។
តាមរបាយការណ៍ពីមន្ត្រីនគរបាលចរាចរស្រុកត្រពាំងប្រាសាទបញ្ជាក់ថា គ្រោះចរាចរខាងលើរថយន្តបង្កបានបើករត់គេចខ្លួនបាត់ក្នុងកំណាត់ផ្លូវជាតិ RP174ឆ្ពោះទៅខេត្តព្រះវិហារ។ ពេលនោះសមត្ថកិច្ចបានស្ទាត់ឃាត់បាននៅព្រំប្រទល់ខេត្ត ដោយអ្នកបើកបររថយន្តឈ្មោះ ហាន ស្រីលីន ភេទស្រី អាយុ១៩ឆ្នាំ មុខរបរជាជាងសំអាងរស់នៅក្នុងផ្សារស្រុកត្រពាំងប្រាសាទ ខេត្តឧត្តរមានជ័យ។
បើតាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញកុមារីរងគ្រោះខាងលើរត់ឆ្លងថ្នល់មានបំណងទៅមើលបងប្រុសរបស់ខ្លួនស្ទូចត្រីនៅលើក្បាលលូ ក្បែរចិញ្ចើមថ្នល់ លុះរត់ជិតផុតថ្នល់ទៅហើយស្រាប់តែមានរថយន្តកាមរីបាឡែន ដែលកំពុងតែបើកបរពីលិចទៅកើតដល់ចំណុចកើតហេតុបានរេចង្កូតបុកក្មេងស្រីផ្នែកចំហៀងរថយន្តខាងស្តាំ បណ្តាលផ្លោងទៅធ្លាក់ចិញ្ចើមផ្លូវប្រវែង៥ម៉ែត្ររងរបួសបែកក្បាលយ៉ាងដំណំព្រមទាំងរបួសដៃជើង។ បន្ទាប់ពីកើតហេតុភ្លាមៗរថយន្តបង្កក៏បន្ថែមល្បឿនទៅមុខទៀតក្នុងបំណងរត់គេចខ្លួនឆ្ពោះទៅខេត្តព្រះវិហារ ប៉ុន្តែដោយមន្ត្រីនគរបាលស្រុកត្រពាំងប្រាសាទបានសហការជាមួយមន្ត្រីកងរាជអាវុធហត្ថឈរជើងនៅចំណុចអូរតាខៀវ ក៏បានធ្វើការស្ទាក់ចាប់បានរថយន្តបង្កនៅចំណុចព្រំប្រទល់ខេត្តឧត្តរមានជ័យ និងខេត្តព្រះវិហារ រួចក៏បញ្ជូនរថយន្តនោះយកទៅរក្សាទុករង់ចាំការដោះស្រាយតាមនីតិវិធី៕
ប្រភព៖ កម្ពុជាថ្មី
