បាត់ដំបង ៖ គួរបញ្ជាក់ថាកាលពីព្រឹកថ្ងៃទី១៦ ខែតុលា ឆ្នាំ២០១៣ សពយុវជនម្នាក់ត្រូវបានគេប្រទះឃើញដេកស្លាប់នៅក្នុងបរិវេណវិទ្យាល័យស្រុកកំរៀងស្ថិតក្នុងភូមិអូរដារ ឃុំអូរដារ ស្រុកកំរៀង ខេត្តបាត់ដំបង ដោយសពជនរងគ្រោះពុំមាននរណាម្នាក់ស្គាល់ពីអត្តសញ្ញាណឡើយ។
ដោយមានការស្រាវជ្រាវយ៉ាងល្អិតល្អន់ពីកម្លាំងសមត្ថកិច្ចរួចមកនៅល្ងាចថ្ងៃទី១៧ ខែតុលា ឆ្នាំ២០១៣ ជនសង្ស័យចំនួន៤នាក់ត្រូវបានឃាត់ខ្លួនជាបន្ដបន្ទាប់ដោយ ទី១.ឈ្មោះ ញឹម សំអាត ហៅសេម ភេទប្រុស អាយុ៣៦ឆ្នាំ ជាជនដៃដល់រស់នៅភូមិតាហែន ឃុំក្ដុលតាហែន ស្រុកបវេល ទី២.ឈ្មោះ ម៉ន សុខឿន ភេទប្រុស អាយុ២៦ឆ្នាំ ទី៣.ឈ្មោះ ទូច ទី ភេទស្រី អាយុ៣៣ឆ្នាំ ជាប្ដីប្រពន្ធរស់នៅភូមិដូង ឃុំបឹងរាំង និងទី៤.ឈ្មោះ ហ៊ីម រ៉ូស្សាលី ភេទប្រុស អាយុ៣៣ឆ្នាំ រស់នៅភូមិស្វាយ ឃុំបឹងរាំង ស្រុកកំរៀង។
តាមការរៀបរាប់ពីជនដៃដល់ឈ្មោះ សេម បាននិយាយថា គេបានស្គាល់គ្នាជាមួយជនរងគ្រោះឈ្មោះ ទេព ទិត្យសំអុល ហៅម៉ាក អាយុ១៩ឆ្នាំ រស់នៅភូមិសាំងរ៉ាំង ឃុំសាំងរ៉ាំង ស្រុកបវេល។ ក្រោយពេលបានជួបគ្នារួចមកជនសង្ស័យបានពឹងឲ្យជនរងគ្រោះជូនខ្លួនទៅលេងកូននៅភូមិតាហែនដោយធានាចាក់សាំងឲ្យ ឯជនរងគ្រោះបានប្រើប្រាស់ម៉ូតូម៉ាកសង់ធុនសេ១២៥ ពណ៌ខ្មៅ ស៊េរីឆ្នាំ២០០៨ ពាក់ស្លាកលេខ បាត់ដំបង ១D-៧៩២១។
ជនសង្ស័យបានបន្ដថា ពេលទៅដល់តាហែនគេក៏បបួលគ្នាទៅជក់ម៉ានៅស្រុកកំរៀង នៅពេលនោះគឺម៉ោងប្រហែលជាង១០យប់ជនសង្ស័យចាប់ផ្ដើមមានគំនិតមិនល្អក៏បបួលជនរងគ្រោះចូលទៅក្នុងវិទ្យាល័យកំរៀងដោយអះអាងថា ចូលទៅយករបស់របរសាលា នៅពេលនោះហើយដែលជនសង្ស័យបានប្រើប្រាស់ពូថៅកាប់កញ្ចឹងកពីក្រោយបណ្ដាលឲ្យផុងលលាដ៍រួចទាញផ្ងាកាប់១ពូថៅទៀតទៅលើចិញ្ចើមឆ្វេងទើបគេជិះម៉ូតូចេញទៅជួប២នាក់ប្ដីប្រពន្ធខាងលើដើម្បីអោយយកម៉ូតូនេះទៅបញ្ចាំក្នុងតម្លៃ៣០ម៉ឺនរៀល ដែលអ្នកទទួលបញ្ចាំឈ្មោះ ហ៊ីម រ៉ូស្សាលី ហើយក៏បានយកលុយនោះទៅជក់ម៉ាបន្ដទៀតរួចក៏ទៅសម្ងំតាមផ្ទះរៀងៗខ្លួនយ៉ាងស្ងៀមស្ងាត់។
លោកអធិការ ឈឹម គឹមហុង បានបញ្ជាក់ថា នេះគឺជាការខិតខំប្រឹងប្រែងដើម្បីតាមស្រាវជ្រាវរកមុខសញ្ញារហូតក្រសោបបានទាំងសំបុក ដើម្បីកសាងសំណុំរឿងបញ្ជូនខ្លួនទៅតុលាការនិងវិនិច្ឆ័យទោសទៅតាមផ្លូវច្បាប់៕
ប្រភព៖ កម្ពុជាថ្មី
